ai merii ham_raqs mujh ko thaam le
zindagii se bhaag kar aayaa huu.N mai.n
Dar se larazaa.N huu.N kahii.n aisaa na ho
raqs_gaah ke chor daravaaze se aakar zindagii
Dhuu.NDh le mujh ko nishaa.N paa le meraa
aur jurm-e-aish karate dekh le

ai merii ham_raqs mujh ko thaam le
raqs kii ye gardishe.n
ek mubaham aasiyaa ke daur hai.n
kaisi sargarmii se Gam ko rau.ndataa jaataa huu.N mai.n
jii me.n kahataa huu.N ki haa.N
raqs_gaah me.n zindagii ke jhaa.Nkane se peshtar
kulfato.n kaa sang_rezaa ek bhii rahane na paaye

ai merii ham_raqs mujh ko thaam le
zindagii mere liye
ek Khuunii bhe.Diye se kam nahii.n
ai hasii.n-o-ajanabii aurat usii ke Dar se mai.n
ho rahaa huu.N lamhaa lamhaa aur bhii tere qariib
jaanataa huu.N tuu merii jaa.N bhii nahii.n
tujh se milane kaa phir imkaa.N bhii nahii.n
tuu merii aarazuuo.n kii magar tamsiil hai
jo rahii mujh se gurezaa.N aaj tak

ai merii ham_raqs mujh ko thaam le
ahad-e-paariinaa kaa mai.n insaa.N nahii.n
bandagii se is dar-o-diivaar kii
ho chukii hai.n Khvaahishe.n be-soz-o-rang-o-naatavaa.N
jism se tere lipaT sakataa to huu.N
zindagii par mai.n jhapaT sakataa nahii.n
is liye ab thaam le
ai hasii.n-o-ajanabii aurat mujhe ab thaam le

Leave a Reply

Content Protected Using Blog Protector Plugin By: Make Money.